防水四核王DoCoMo F-10D

[太陽]最近DoCoMo就推出全新的Arrows X F-10D，唔單止係日本首部四核心Smartphone，仲對應IPX5/8防水標準，打風落雨都唔怕；加埋大量影相特效，無論晴天、雨天都啱用！日系手機與「防水」二字幾乎畫上等號，根據調查所得，現時的日本手機市場，防水手機足足佔了整體的80%銷量。

除有防水功能外，F-10D另一賣點係四核心，處理器為NVIDIA的Tegra3，時脈達1.5GHz，加上內置1GB RAM，同時打機、上網、Snapshot都絲毫唔窒。用Benchmark測試，得分只落後另一機王Galaxy S3少許，效能超班！機能強唔等於食電，因為處理器內置省電技術，系統閒置時會改用另一粒低壓核心來運作，配合「NX! eco」省電模式，用戶可因應需要開關Wi-Fi、GPS等耗電裝置，並可自設關閉時間，操作非常人性化！

外觀方面，坦白講以日系機來說，圓渾機角加肥厚機身絕對唔算「靚仔」，但着芒後卻是另一回事，事關屏幕足有4.6吋之巨，解像度更高達1,280×720，睇網頁相當仔細。小記用埋內置的《Sonic HD》實測，發覺超音鼠無論俯衝定係打觔斗都唔見有鬼影，而且背景顏色鮮艷得來不刺眼，打機都舒服過人。特別一提，除了光暗，用戶還可調校屏幕色溫，偏紅定偏藍任君選擇。

F-10D由Fujitsu代工，好自然有埋廠商招牌作指紋開機功能，而指紋識別器旁邊更設有1,310萬像素鏡頭，相片成像質素高之餘，還提供甚多好玩「分唇」，例如可連拍至記憶卡爆滿，又支援兩級HDR調校、全景、魚眼、負片及ToyCamera等模式等等，Snapshot夠晒趣味。至於系統，行Android 4.0係意料之內，最特別係內置咗一個「Slide-in Launcher」，用戶只要在屏幕邊拉一拉手指，就能弄出圓形啟動器來開啟常用Apps，連功能表都唔使入，勁方便！