初音到港吸金 PSV炒硬四千

[蘋果]日本虛擬偶像初音未來，將在十月來港「獻唱」，$280門票已火速售罄，得番貴價企位票，初音未發力已感受到其熱潮。 PSV再推一把，香港跟日本同步推出限量 PSV同梱裝，白色主機底面都有初音，加埋 AR虛擬初音卡同音樂節拍 Game，再用靚到殺死人嘅禮盒包裝，就算唔係 Fans，都會心動畀錢。


機底半睡初音　打機似抱抱
在「 PSV初音未來限定版同梱裝」之中，除遊戲之外，最讓 Fans流口水的，是初音 PSV特別版主機，機背印上初音飄浮畫像，玩家打 PSV時就如雙手捧住半睡狀態嘅初音一樣，仲唔冧死？至於主機本身會以晶瑩白色 PSV3G/Wi-Fi版為基礎，再配上原創設計機身保護貼，及加上初音版的 AR卡片，成部主機塞滿晒初音元素，完全係粉絲的身份證明，據講限量版的訂額已完全 Full晒，手慢嘅 Fans惟有捱炒價，而 Game舖「保守」估計，起碼炒上四千蚊以上！

32首歌曲 Fans盡興

《初音未來-Project DIVA-f》首次在 PSV上推出，玩法沿用系列傳統，考驗玩家節奏及音樂感，畫面隨住初音唱歌跳舞時，玩家掌握節奏按下屏幕，不過共32首歌曲，從未收錄在同系列遊戲，所以極度考驗玩家對初音的熟悉度。想同初音一齊成功演出，「出手」時都要注意一下技巧，除了按 PS掣的「×、○、△、□」外，當見到出現星星，就要跟指示按下屏幕，只要成功完美地點擊，就可得到額外分數，初音同時亦會更落力以更華麗方式表演，玩家的努力，絕對值回票價！世嘉重新打造3D初音，姿勢更生動，光影效果亦更出色，加上80套衫畀你換，嘩，宅男 Fans肯定冧到癲！