Sony Walkman Z系列 首玩Android

當部部智能手機都可以聽歌，點解仲要買數碼音樂播放器？音質表現較佳當然係最大誘因！遠睇似Xperia手機多過似Walkman的Sony Walkman Z系列，破天荒首次用上Android系統，更配備S-Master MX數碼放大器、清晰重低音、清晰立體聲同埋有數碼音質提升處理器，音質表現細緻具層次，尤其高頻部分經過「還原」後已甚貼近CD音質，靚過智能手機多多聲！

星級技術減失真
Sony這部新推出的 Z1000系列Walkman，終於都改用較似智能手機嘅設計，配備4.3吋大屏幕兼內置Android 2.3系統，可以上Google Play下載新Apps玩，驟眼睇跟Sony Xperia系列手機都幾似樣，不過作為數碼音樂播放器，Gimmick嘢始終都係點綴，音質先係重點；這方面NWZ-Z1000就真係交足功課。玩開音響都有聽過Sony嘅S-Master數碼放大器，能夠減低數據轉換時嘅失真同噪音，到新Walkman更用上升級版S-Master MX數碼放大器，進一步減低失真；另外亦用上能夠修補數碼音樂檔案高頻失真嚴重問題嘅數碼音質提升處理器（DSEE），令聽Walkman都可享受好似屋企歎高階音響嘅效果。

另配XBA耳機效果更好
新Walkman Z系列另設清晰重低音和清晰立體聲技術，配合EX系列耳機，試聽效果都算唔錯，但如想享受更高音質，配埋Sony XBA系列耳機就更好。小記即場換上四動鐵式單元的XBA-4耳機，聲音延伸力更強，Detail位更仔細，音質再升高多一層次。Sony在預售期間更提供新Walkman Z系列連XBA系列耳機嘅套裝，比分開買平約$300。就算唔連耳機，Walkman Z系列內置嘅xLOUD喇叭系統所輸出嘅音效都相當有水準，音量亦估唔到咁澎湃，睇片或睇MV就至啱。

機身、介面設計花心思
機身設計到介面設計都花過心思，機身唔再係一塊平面，機底部分中央位置較薄但上下較厚，依足人體工學設計，拎起分外舒服，亦無咁易跣手。機側亦設有W.Button按鈕，一按即可啟動W.Control應用程式，唔使觸控畫面都可瀏覽音樂目錄。揀歌時除咗可以「正正常常」咁喺清單選揀之外，亦可以用隨意觸動唱片封套嘅Cover Art View模式；另外亦可以任由Walkman自己將歌曲庫分類編排入14個頻道，再視乎當日心情揀選對應頻道聽歌。此外，Walkman Z系列擴充性亦夠強，可以透過機身上的Mini HDMI頭接線上電視播片之外，更同Sony Tablet睇齊，可用Wi-Fi連上電視玩埋無線「Throw」影片、音樂同相片！