神戶吊高吸靈氣

 
神戶，除了有牛柳和清酒，還有當地悠閒寫意的傳統生活。原因無他，因為地理偏僻、大自然風景絕美，今次要遠走六甲山，坐吊車登高吸靈氣。

 
到日本神戶旅遊，與東京之分別，就係神戶仍有一種未被污染的感覺，起碼在街上聽到的，不是廣東話不是普通話，心理上已覺得置身外地、脫離繁囂。從神戶市中心往北走，向六甲山進發，那裏更可飽覽神戶內海一望無際的風景、有馬溫泉，以及有靜到會耳鳴的藝術區。 
 
六甲山藝術區，原先只係一個普通旅遊區，有餐廳、小食店、手信店等。但今夏開始，新興建了一座六角形的自然體感展望台，簡單來說係一件藝術建築，外面六角形的支架好似太空館的「菠蘿包」一樣，內裏建築以木為材料。建築名為「自然體感」，都暗示了它的特色。建築跟風和水、熱和冷有密切關係，安坐其中會感受到一股凉風引入建築物，夏天時外面的熱風更會穿過製冷機，透過座位旁的通風口送出，令遊客凉浸浸。中間的「山洞口」，除了因為熱空氣上升外，這個洞更是雨水的入口，透過地下凹陷的水槽收集雨水，夏天來都唔怕熱。

 
美景伴食鳥巢咖喱豬扒

遊完山水、體感完藝術建築，一般遊客都會在 Mt. Rokko View餐廳，食埋個 lunch先走。餐廳一大賣點，就係擁有無敵的遠景，可以眺望環球影城、東神戶大橋、六甲大橋、神戶機場等，望住個靚 view食飯。這裏最地道的咖喱豬扒飯，好像鳥巢的咖喱飯，設計源自旁邊的自然體感展望台外觀。味道方面，咖喱夠辣，美中不足是天氣凍令食物唔夠熱。

要自由行上六甲山，好簡單， JR六甲山駅就有巴士及鐵路載你上山，但這並非重點，而是帶你「又越過高山又越過谷」的六甲有馬索道，這架有 40年歷史的吊車，是連接六甲山和有馬溫泉區的主要交通工具。在六甲山上要去到頂駅先係索道吊車，由此 10分鐘可到有馬溫泉區，沿途風景絕美。
10分鐘的索道吊車，就來到有馬溫泉駅，這裏被譽為神戶內客廳的有馬溫泉，名列日本三大古泉之一。能夠為一個溫泉區興建吊車站，可想而知溫泉店有幾多，一到埗就見到街上放了一槽的溫泉熱水，讓抵達的遊客舒緩腳部疲勞，當然亦係引大家幫襯溫泉店的手段啦。沿着有馬町往上走，都是外貌古舊的房屋，偶爾有穿着和服的女士走過，感覺就像回到江戶時代。

除了溫泉，由元祖三津森生產的炭酸煎飯，相信就是有馬町的特產。這家飯店有八間咁多，但全都在有馬區，在外面一定搵唔到。至於這個原味的煎餅做法非常簡單，煮好的蛋漿蓋印壓扁就是，食落感覺就像香港都有賣、一包兩片那種蝦片。遊客不單止可透過玻璃，觀賞到師傅在簡單的工房製作，他們還會將新鮮製作的煎餅，遞給外面的遊客試味。